Wendy's Blog

中西合壁?

早前與同事傾開﹐佢問我會唔會同美國人(非華裔)拍拖。 其實呢個問題我都被人問過好多次。香港既朋友問可能係覺得我係美國甘耐﹐好可能已全盤西化。美國朋友問可能係出於好奇。當然愛情應該係唔分種族﹐中外通婚成功例子亦不少﹐而且將來既野好難話得埋。但係好坦白講﹐我連諗都無諗過同美國人拍拖﹐基本上就算同係中國人﹐如果言語不通(當然係指唔係講廣東話)﹐我都會好有保留。唔係因為家人會反對﹐其實我屋企都有個鬼佬﹐M&D 都預左佢娶鬼妹。只不過我覺得文化背景太大差異﹐一定會遇到好多問題。雖然我係美國日子唔淺﹐日常與同事朋友相處無咩問題﹐但係拍拖結婚就好唔同﹐牽涉到好多傳統﹐價值觀既野﹐唔係甘容易compromise. 講真﹐男女既諗法﹐溝通方法都已經夠大分別﹐同background 既人拍拖都可以誤會重重﹐再加上中西文化分冀﹐我就覺得會好煩啦。

不過其實對我黎講﹐最重要既係我好希望可以同一個跟自己關係甘密切既人毫無保留地分享自己既諗法﹐經歷﹐同自己鐘意既野呀甘。雖然自問英語流利﹐但係有好多野都係要用廣東話講先得。而且如果我同佢講金庸﹐衛斯理﹐考會考﹐粟一燒﹐雞蛋仔﹐竹野內豐﹐林文龍﹐佢唔知我講咩﹐我會覺得好無癮囉。

唔知大家又點睇呢? 請發表下意見啦!

posted by 板板子 @ 6:26 PM