Wendy's Blog

台慶與我

11月19日係一個好特別既日子﹐一個相信係BL有生之年都唔會忘記既一日...就係無記既台慶。

細個既時候﹐未有internet, 又未興唱K, 又無cable, 所以除左睇書﹐平時最大既娛樂就係睇電視啦。記得幼稚園既時候BL係讀下晝班既﹐加上BL父母好laissez-faire , 所以細細個就已經會睇埋歡樂今宵先至訓。之後小學﹐中學﹐好少出街﹐下晝就會睇下早期既日劇﹐平日夜晚當然會睇劇集啦。記得某年暑假﹐無記係中午重播劉華同陳玉蓮套神雕﹐2點重播鑽石王老五﹐BL差不多成個暑假都係步係個電視前面。甚至乎考會考既時候都照常睇電視﹐因為果時好似做緊某套黎明既劇集, 不過for the record, BL當時好有discipline 讀書架﹐所以會考成積一d都唔失禮。

因為係一個電視迷﹐所以每年都好期待台慶既來臨﹐睇明星都係其次, 最緊要係係龍鳳呈祥賀台慶既時代﹐每年都有鄧英敏出黎送番層樓既超級電視迷問答遊戲。BL 最鍾意玩問答遊戲, 每次睇都好興奮﹐好投入﹐甘當然好多問題都答得岩啦。

係幾年前﹐菜C 同菜頭同菜花﹐係等食飯既時候自己玩左一次超級電視迷問答遊戲﹐由莊靜宜, 賈思樂, 露雲娜﹐景黛音, 蔡立﹐講到黃造時, 好正。不過最經典既問題當然就係﹐香港83﹐點解要殺死由熊良錫飾演既亞D啦。不過當然呢個問題係難唔到一個超級電視迷既。

時移世易﹐BL 對上一套睇既劇集係已經年代久遠既刑偵IV。所以BL都已經收左山﹐唔再玩超級電視迷問答遊戲啦。

posted by 板板子 @ 6:52 PM