Wendy's Blog

煉奶情意結

今日聽見你話食餅乾﹐令我諗番起細個既至愛宵夜煉奶浸餅乾。講呢樣野之前﹐扯開話題講下鮮奶先。細個既時候﹐飲奶梗係用奶樽啦。唔知點解﹐係我記憶所及﹐放低奶樽之後﹐亞媽就無再俾過奶我飲。之後再飲奶亞爸係小一既時候帶我去深水埗德貞附近間麥記﹐食薯條漢堡包﹐但係點解要飲奶既? 人地明明由細到大都係飲可樂架喎﹐食快餐反而要我飲奶? 九唔搭八! 再加上唔知點解麥記D奶好難飲﹐飲左一啖﹐我就嘔。於是由果時開始﹐我就無再飲過奶(食cereal 除外﹐不過果D唔算飲啦)。

雖然唔鐘意飲奶﹐但係就好鬼鐘意煉奶。奶油多當然無煉奶不可﹐重有炸饅頭又可以點煉奶﹐飲野唔夠甜又可以加煉奶。但係最令我念念不忘既都係自家既煉奶浸餅乾。唔知係亞媽教我定係點﹐但係好記得時時會係夜麻麻既時候﹐走去廚房﹐拎隻有蓋既專係用離焗公仔麵既膠碗﹐然後整兩匙煉奶落個碗度﹐再噤D熱水開稀D奶。然後放D餅乾落去﹐浸到佢林晒﹐然後用匙but 離食。嘩﹐好好食架! 食到最後重可以飲埋D煉奶﹐真係好正架! 諗番起﹐有無數既夜晚﹐都因為煉奶浸餅乾而變得精彩! 真係好懷念! 但係而家諗番起﹐又有好多疑竇...點解係記憶中﹐我每次食煉奶浸餅乾都係坐係部電視前面﹐10寸以內既範圍既? 乜亞媽甘都唔罵既? 其實﹐好似次次食親都係得我自己一個﹐點解既? 我D屋企人去晒邊呢? 既然甘鐘意食﹐點解好似十歲前後就無再食架呢? 究竟當中又發生左D咩耐人尋味既故事呢? 可惜﹐可惜﹐呢一切都已經無從稽考。不過無所謂啦﹐煉奶浸餅乾﹐我只係知道係呢一刻﹐我係想念你。

posted by 板板子 @ 6:24 PM