Wendy's Blog

Mitsuwa

有少少無心機﹐不過睇完D相又開心番﹐其實呢個假期都過得好開心﹐快D寫下先得。

因為忌廉頭想食正宗又好味既拉麵﹐於是一早講好禮拜六去Mitsuwa。無咩agenda, 所以施施然十一點幾先出發﹐幾好﹐避左D去海灘既traffic。 一來禮拜六﹐二來long weekend, Mitsuwa 人山人海﹐不過我地又好好甘泊到個好近既位﹐跟住分頭去買野食。我買飯﹐忌廉頭買麵。個定食好抵﹐又蝦﹐又豬﹐又湯﹐有薯蓉﹐可惜唔記得影相。麵都係好好既﹐不過間鋪實在太好生意啦﹐好似成半個鐘先有得食﹐係等既時候重撞到姊妹E添。不過等唔緊要﹐最緊要好味。食完又係超市行一轉﹐又去書店行﹐又去睇D得意野。行完室內行室外﹐當日天氣極好﹐微風﹐有少少雲﹐係河邊行行重行行﹐去埋隔離既driving range﹐去埋Staples, 去埋Target, 行完口渴﹐就返去飲水。真係好鐘意Mitsuwa D 食店全部有水有杯﹐好方便。之後又梗係要食番D綠茶雪糕﹐今次有新野roasted green tea flavor, 好味。之後返超市買D 零食﹐見識下D好貴既和牛。再去買D Obanyaki 孝敬媽媽們﹐點知到呢個時候﹐就輪到買紅豆包要等﹐無計﹐於是又返去書店﹐忌廉頭買到張好得意既結婚卡俾亞肥s, 之後D紅豆包都得啦﹐於是就走啦。

今次發現Mitsuwa 特別多忌廉頭鐘意既野﹐就係細路仔同埋狗仔。唔知點解週圍都係D BB仔既﹐而D日本細路又特別可愛既﹐於是我地就係甘望D 細路仔﹐跟住又見到D得意既狗狗。除左食野﹐我地就係度BB watch 同doggy watch。最得意係係Staples 有個韓國小朋友見到隻白狗仔﹐本來沒精打彩既小朋友即刻好開心﹐係甘想摸隻白狗仔﹐跟住我地又跟住帶白狗仔既婆婆一陣﹐唔知有無俾佢發現呢?

回程既時候﹐終於達成左我多年來既心願﹐就係係West New York 望返去Manhattan 既park 影相啦﹐謝謝你﹐忌廉頭。自從我識得去還是Yaohan 既Mitsuwa 既時候(已經好耐好耐lu), 我就好想落車係果度影相﹐之後去過無數次﹐不過無諗過姊妹們會有興趣甘做﹐所以都無提出過。今次好啦﹐終於達成心願﹐而且有忌廉頭係度﹐D相當然影得好啦。

返到屋企就去Five Guys 食野﹐然後睇Shooter, 影評忌廉頭寫左﹐大佬大嫂﹐有中文版﹐唔使強烈要求啦。

posted by 板板子 @ 10:06 PM