Wendy's Blog: 一題兩寫: 拍拖要唔要成日見?

Thursday, December 13, 2007

一題兩寫: 拍拖要唔要成日見?

見拿頭講個甘有趣既題目﹐等我又講埋一份先得。

拍拖要唔要成日見呢? 我諗要define 下咩叫做"要"同"成日"先, 我諗無咩話係一定要做既﹐但係拍緊拖應該會想經常見到面既﹐用"成日"呢個字眼好似講到見面係一件苦事甘。我諗呢﹐最大既問題係住係美國﹐除非大家同住一大城市﹐返工地方近﹐又或者住係附近﹐否則要係平日經常見面真係比較難。如果工作時間長﹐再加上大家有家人係度就更加難啦(好似係度講緊自己甘添)。因為放工都夜啦﹐重要做屋企野呀﹐做教會野甘架麻﹐邊可以時時出黎呢。

不過大家返同一教會都算好好啦﹐weekend 可以一齊返團契同崇拜﹐加上禮拜五放工後可以見面﹐甘如果打埋badmin 一個禮拜七日見到四日。加上日常email 呀﹐每日講電話呀﹐IM 呀﹐我諗都足夠時間交通既。至於日對夜對會悶死﹐我又覺得唔會既﹐如果拍拖時都會悶死甘結左婚點算呀? 如果拍拖既時候都無想朝夕相對既憧憬﹐甘點可以一生一世呀?

"況且對得太多﹐被發掘缺點的機會也會越多。" 呢點我同意既﹐但係我又覺得唔怕囉﹐未結婚之前發現對方既缺點總好過結左婚之後先知而後悔呀。同埋如果真係愛一個人﹐要接受對方既全部架麻。如果對方知道我既缺點都包容我﹐我可以好真實甘做番自己﹐唔怕對方點睇﹐其實真係一種好得釋放既感覺。

甘我既結論係咩呢? 我諗拍拖階段要日日見有實際既困難﹐日日見亦唔代表D咩既。如今科技發達其實真係有好多交通既辦法。我亦覺得得未結婚前有D私人空間係好既﹐不過我諗熱戀時期梗係想爭取見面既機會既。如果真係到"期望每朝早起身一吻紅的臉"既時候﹐甘咪結婚囉。