Wendy's Blog

兩國四城自由行之嘩一聲既甜品

飲飲食食﹐係返香港既另一主要節目。一向主修甜品既BL﹐係未返之前已經做齊資料搜集﹐目標係日日都食一次甜品!

急不及待﹐返去第一日﹐好友S帶左BL同A子去係銅鑼環既發記嘆甜品下午茶。三位分別叫左馬荳糕﹐薑汁蓮子清心丸﹐同楊枝甘露。第一次食清心丸﹐口感唔錯。楊枝甘露有好多芒果﹐好好味。最後再加一個芒果pancake, 可能因為有cream, 芒果又靚﹐好好食﹐好岩BL既口味。不過就無影到相。



同一晚﹐同好友S同佢男友係跑馬地既竹園海鮮飯店食完飯﹐發現大家都係主修甜品既同道﹐於是去左係附近既滿屋甜品﹐叫左西米芋蓉焗布甸﹐西米芝麻焗布甸﹐綠茶pancake, 同湯丸。焗布甸好好味﹐尤其係芋蓉果種。



第二日﹐返完教會﹐同A子去找公和荳品食豆腐花。點知未開市﹐不過唔緊要﹐因為大家都想去係元州街既松記糖水。未走之前﹐旅遊大使已經大力推介松記既幻彩明珠﹐好友S既男友又提議試下綠茶奶皇湯圓﹐既然係甘﹐就叫呢兩樣啦。果然無介紹錯!!! 幻彩明珠好大碗﹐有好多生果﹐大西米﹐涼粉同紫米﹐好好味。BL亦第一次食涼粉﹐發現係真係唔鐘意食既。至於個綠茶奶皇湯圓, 真係超正! 從來對湯丸既興趣都不大﹐但係綠茶皮﹐ 奶皇餡真係一個絕配! 奶皇好香﹐又唔似其他餡甘漏。食完一口﹐真係忍唔住要嘩一聲!



同一晚﹐一早係君悅既Tiffin Lounge 訂左位食dessert buffet. 情調同景都唔錯。個人最愛係芒果布甸。可能係美國食過不少好味既西式甜品﹐Tiffin 人人都讚好既souffle, 反而只覺得一般。亞花以前屋企樓下個間Italian 整得重好食。



日日都食一次甜品﹐嚴格來講係做唔到既。不過其實重係City Super 買過豆腐同芝麻雪糕食。之後係澳門﹐上海同東京都有再食甜品(容後再談), 所以今次既收獲都算相當豐富啦。

posted by 板板子 @ 6:15 PM