Wendy's Blog

QHC 的崇拜

雖然呢個weekend 玩得好盡﹐但係我地都好乖架﹐禮拜日一早就去左QHC 既早堂崇拜。

其實間中去下其他教會既崇拜好唔錯﹐有時返崇拜返到有D公式化﹐去其他教會會有D 衝擊﹐可以學習下﹐體驗下不同教會點樣敬拜神。

好似今次甘﹐我真係好enjoy QHC 既詩歌讚美﹐雖然D 歌我地都時時唱﹐但係praise team 將D 歌串做medley, 係唱既時候又有唔同既感受。

不過最大既得著係聽鄺牧講道。講到詩篇23﹐我地誤解左﹐以為"耶和華是我的牧者，我必不致缺乏。" 係話神會俾我地想要既野我地。其實既意思應該係﹐我有左神﹐就咩都有啦﹐唔再需要任何野。It's different from God will give me everything I want 架。其實係美國﹐雖然好富庶, 但係人既物欲好似無低洞一樣﹐加上大家都會同人比較, 好多時﹐人都會有種"我有我故在" 既諗法, 將自己既價值建立係我擁有點樣既車﹐屋﹐有幾多個學位﹐仔女有幾叻。其實我地既價值係在於我地係神所造所愛既身份﹐同我地擁有D咩﹐一D關係都無。再講深一層﹐人有甘多欲望﹐就好似被囚禁甘﹐又點可以將自己全然獻上俾神呢?

呢個信息真係俾我好大既提醒! 其實﹐自己好多野都有﹐但係時時都得一就想二。同埋﹐亦好多時只睇到自己無既野﹐唔識得為到已經有既去感恩。 真係要好好學習。

鄺牧既信息真係好切身﹐令人印象深刻﹐佢係兩個撒母耳既婚禮所講既我都好記得。相信大家有聽既都會有同感。雖然係對一對新人既勉勵﹐但係對來賓來講﹐無論係已婚未婚既都好都好合用﹐真係要好好記住先得啦.

posted by 板板子 @ 10:52 PM